من كام يوم تم الاعلان عن انه هاتف MATE 30 من هواوي هيطرح في الأسواق بدون نظام أندرويد و من غير خدمات جوجل و مفيش اي معلومه مؤكده بالنظام الي هينزل بيه الهاتف لحد دلوقتي ، و دي كانت ضربه قويه جداً للشركه الصينيه هواوي ، و من الواضح انه هواوي هتحاول انها تبدأ تشتغل علي النظام الي هي بتطوره Harmony OS ، بس في عقبات كتير جدأ هتخلي هواوي متعرفش تنزل نظام التشغيل الجديد ده بسهوله عشان يقدر ينافس انظمه التشغيل التانيه زي Android & IOS
اول و اكبر مشكله هو انه لازم تستعين بعدد كبير من المهندسين و المبرمجين عشان يقدروا يعملوا برامج و تطبيقات لمستخدمين النظام ده ، و ده طبعاً هياخد وقت و مجهود كبير جداً عشان يتم تنفيذه.
تاني مشكله هي فكره تسويق نظام التشغيل ده ، دلوقتي معظم الناس بتستخدم الأندرويد الي جوجل بتطوره ، او الـIOS الخاص بشركه Apple ، فـ يا تري ايه هي المغريات الي هواوي ممكن تستخدمها عشان تحاول تجذب اكبر قدر من مستخدمين الهواتف الذكيه في العالم ؟!
تالت مشكله و هي الهاردوير ،، بمعني ؟
اجهزه الأندرويد بتصدر بمعالجات من شركات زي سناب دراجون او ميديا تك او كيرين الخاص بهواوي ...كل المعالجات دي بتكون مبنيه علي معماريه اسمها ARM ، هنا بقي المشكله انه هواوي مش هتقدر تستخدم معالجات من شركه ARM مره اخري و ده بيجرد هواوي تماماً في السوق...و بردو هواوي بتحاول انها تشوف بدائل لشركه ARM
طبعاً ده مبيخليش في خيارات كتير متاحه للشركه الصينيه هواوي ، مع العلم انه هواوي اطلقت أخر هاتف ليها في السوق العالمي بنظام تشغيل أندرويد هو جهاز Nova 5 ، اما من شركه هونور التابعه بردو لشركه هواوي فـ هو جهاز Honor 9x و الي من المفترض هيتم صدوره في خلال الايام القليله القادمه في مصر.
طيب في ناس هتبدأ طبعاً تقلق و تسأل أسئله زي..
هو كده منشتريش موبيلات هواوي تاني ؟
مشاكل هواوي مع جوجل مع الموبيلات الجديده و القديمه ولا الجديده بس ؟
ابيع موبايلي الهواوي قبل ما الموضوع ينتشر ولا أستني شويه ؟
هل يا تري انا هيوصلني تحديثات أندرويد ولا لا ؟
هل الأندرويد هيتوقف علي أجهزه هواوي ؟
كل دي أسئله هيسألها مستخدمين هواوي في العالم بشكل عام ، و الأجابه علي كل ده بمنتهي البساطه انه مفيش أي مشكله حالياً هتظهر علي الأجهزه الي موجوده في السوق ،، لو موبايل له تحديث أندرويد هينزل ، و التحديثات الأمنيه بردو هتنزل بشكل طبيعي للأجهزه المتاح ليها التحديثات
لو بتحب هواوي و في موبايل عاجبك ليهم موجود في السوق حالياً تقدر تشتريه بأريحيه تامه من غير تفكير ،و متحاولش تبيع جهازك الهواوي بسبب الأزمه و الكلام الكتيرالي بيتقال عشان حرفياً انت هتبيع جهازك بتراب الفلوس بدون أي داعي بحجه انه الجهاز هيبقي حته حديده و دي أشاعات و كلام ملوش اي اساس من الصحه..
زي ما قولنا ، مشكله هواوي مش هتظهر غير في المستقبل لسه ، و نتمني انهم يلاقوا حل في أقرب وقت ممكن..
التسميات
اخبار و معلومات